Lëndohet një 13-vjeçare në një shkollë të Kosovës, shkak sfida “Superman” e TikTokut

Një nxënëse në një shkollë fillore në Gurrakoc të Istogut ka pësuar lëndime trupore, pasi me disa nxënës të tjerë kanë luajtur sfidën “Superman”, që është bërë e famshme në rrjetin social TikTok. Në këtë sfidë, dy deri në tre persona tentojnë ta mbajnë personin tjetër që “fluturon” në krahët e tyre, por në disa raste ata më pas e rihedhin ose nuk e presin fare dhe personi bie në tokë.

Ngjarja në Istog ka ndodhur të enjten (5 dhjetor) gjatë pushimit të nxënësve, ka njoftuar drejtoresha e shkollës, M.K, duke bërë të ditur se me 13-vjeçaren fillimisht është marrë arsimtarja që kishte orë mësimore me atë klasë.

“Rasti fillimisht është adresuar tek arsimtarja që ka pasur orë në atë klasë mandej tek unë. Dhe si shkollë kemi reaguar menjëherë për t’i dalë në ndihmë”, ka deklaruar ajo.