MPB për pagat: Duhet të ekzekutohen që institucionet të mos bllokohen

Pagat në sektorin publik nuk dolën në fund të muajit. Kjo pas skadimit të mandatit edhe të ushtruesit të detyrës së Drejtorit të Përgjithshëm të Thesarit, ku pa nënshkrimin e këtij të fundit, nuk mund të bëhet asnjë dalje e parasë publike nga llogaritë e shtetit.

Meqenëse secili veprim i zyrtarit në fjalë do të ishte kundër Ligjit për Zyrtarë Publik, i cili në nenin 35 e parasheh mandatin e U.D 6+6 muaj (të cilët i kanë kaluar) e jo më gjatë, institucionet kanë pritur një opinion të Ministrisë së Punëve të Brendshme, e cila është përgjegjëse për funksionimin e administratës shtetërore.

“Si rrjedhojë, mungesa e zyrtarëve në këto pozita të kategorisë së lartë drejtuese por jo vetëm, do të rezultonte në pamundësi të menaxhimit dhe drejtimit të veprimtarisë administrative të institucionit dhe si rrjedhojë në mosfunksionim të institucioneve kyçe shtetërore. Mosfunksionimi i institucioneve do të kishte efekt të madh jo për zyrtarët e punësuar në këto institucione, por edhe për qytetarët të cilat pranojnë shërbime nga këto institucione, duke filluar nga shërbimet e gjendjes civile, shëndetësisë, mbështetjes financiare, skemave sociale, lejeve dhe licencave që lëshohen nga institucionet publike e shumë shërbime tjera. Pra, mungesa e zyrtarëve që do të marrin vendime në këto kategori do të rezultojë në bllokim të institucioneve dhe në kufizim të të drejtave të qytetarëve për qasje në shërbimet që institucionet publike janë të obliguara të ofrojnë” – thuhet në këtë opinion ligjor.

Tutje, aty konstatohet se zyrtarët edhe pse kanë tejkaluar afatin ligjor të ushtrimit të mandatit të tyre, duhet ta vazhdojnë mandatin, sepse dëmi do të ishte i madh nëse mandati i tyre do të ndërpritej.

“Andaj, vazhdimi i ushtrimit të detyrave të parashikuara në këto pozita është kruciale për vazhdimësinë institucionale dhe ruajtjen e shërbimeve publike, duke siguruar që funksionet thelbësore të shtetit të mos ndalen për shkak të kufizimeve ligjore, vonesave administrative ose çështjeve të tjera që mund të çojnë në mos funksionim të institucioneve” – thuhet tutje aty.

Ndryshe, Neni 35 i Ligji për Zyrtarët Publik tregon se askush nuk mund të caktohet ushtrues detyre më shumë se një vit.