Vrasja e rreshterit policor në Kaçanik, Prokuroria në Ferizaj thërret konferencë për media

Prokuroria Themelore në Ferizaj ka njoftuar se do të mbajë sot konferencë për media nga ora 14:30 për rastin e vrasjes së rreshterit të Policisë, Muhamed Lika, i cili mbrëmë u qëllua për vdekje para banesës së tij në Kaçanik, shkruan Gazeta Sinjali.

“Pjesëmarrës në këtë konferencë do të jenë Kryeprokurori i Prokurorisë Themelore në Ferizaj, z.Burim Çerkini, prokurori i çështjes z.Ismet Rrahmani, si dhe përfaqësues nga Policia e Kosovës”, thuhet në njoftimin e prokurorisë.

Konferenca do të mbahet në objektin e Prokurorisë Themelore në Ferizaj, kati i dytë, salla e takimeve nr. 315.

Rreshteri i Policisë së Kosovës, Muhamed Lika, është vrarë rreth orës 23:00 të së martës.

Hetimet për këtë rast kanë nisur, ndërsa rrethanat e ngjarjes nuk dihen akoma.

I dyshuari në lidhje me këtë rast ndodhet në arrati.