Taravari: Kurti është ndër kryeministrat më të rëndësishëm në botë për shqiptarët, kush mendon ndryshe i ka ndryshuar ADN-ja e shqiptarit

Taravari i papërmbajtur në lëvdatat për Kurtin, pas kritikave që iu bënë në lidhje me deklaratat e tij për Gjuhën Shqipe në Maqedoni të Veriut.

Ministri shqiptar i Shëndetësisë në Qeverinë e Maqedonisë së Veriut, Arben Taravari, ka thurur lavde për Kryeministrin e Kosovës, Albin Kurti, duke thënë se është ndër kryeministrat më të rëndësishëm në botë për shqiptarët dhe se kush mendon ndryshe “i ka ndërruar ADN-ja e shqiptarit”.

Këto komente, Taravari i ka bërë përmes një postimi në Facebook, duke e mbrojtur kështu nga kritikat e shumta që iu bënë atij pas konferencës së përbashkët me kryeministrin maqedonas në Prishtinë, ku tha se Gjuha Shqipe nuk po rrezikohet në RMV dhe se e njëjta nuk është zyrtare.

“Kryeministri i Kosovës, Albin Kurti, është një nga Kryeministrat më të dashur për ne dhe padyshim ai dhe Kryeministri i Shqipërisë, Edi Rama, janë ndër Kryeministrat më të rëndësishëm në botë për të gjithë Shqiptarët dhe PIKË”, shkroi Taravari.

Kush mendon ndryshe, kreu i Aleancës për Shqiptarët, deklaroi se “i ka ndërruar ADN-ja e shqiptarit me ADN-në e interesit…”.