Policia e Kosovës gjatë një bastisje gjen narkotikë, armë zjarri dhe municion në Leposaviq

Policia e Kosovës, më saktë Drejtoria për Hetimin e Trafikimit me Narkotik gjatë një bastisje në Mitrovicën e Veriut ka gjetur narkotik, armë zjarri dhe municion.

I dyshuari nuk është hasur në shtëpi gjatë bastisjes por i njëjti është në kërkim nga Policia e Kosovës.

“Me datë 13.05.2024 DHTN në fshatin Zamenicë, Komuna e Leposaviqit ka realizuar një bastisje të shtëpisë dhe objekteve përcjellëse të personit të dyshuar mashkull kosovar, ku gjatë kontrollit janë gjetur dhe sekuestruar: Gjashtë qese me sasi të substancës së dyshuar të llojit marihuanë me peshë rreth 2600 gram, një pushkë gjuetie dy tytëshe me 26 fishekë, katër karikatorë të armës së gjatë AK-47 me gjithsej 23 fishekë dhe dhe një radiolidhje”, thuhet në njoftim.

Sipas njoftimit, në lidhje me rastin njësia e forenzikës ka bërë fotografimin dhe sekuestrimin e provave, po ashtu është njoftuar edhe prokurori kompetent ku me udhëzim të tij janë iniciuar rastet ‘Blerja, posedimi , shitja dhe shpërndarja e paautorizuar narkotikëve substancave psikotrope apo analoge’ dhe ‘Mbajtje në pronësi, posedimi i pa autorizuar i armës’.