Polici kosovar gjen 1 mijë e 900 euro para në rrugë, ia kthen pronarit

Një gjest i ndershmërisë dhe profesionalizmit është shënuar mbrëmë nga zyrtari i Policia e Kosovës, Admir Kamerolli, i cili së bashku me një gazetar kanë gjetur një kuletë me para në rrugë dhe kanë vendosur ta dorëzojnë menjëherë në polici.

Sipas informacioneve, në kuletë ndodheshin rreth 1 mijë e 900 euro, një shumë e konsiderueshme parash, si dhe dokumente personale të pronarit. Pa hezitim, Kamerolli dhe gazetari që ishte me të e kanë dërguar kuletën në stacionin më të afërt policor, duke ndjekur procedurat përkatëse.

Pas verifikimeve të nevojshme nga zyrtarët e policisë, kuleta me të gjitha paratë dhe dokumentet është identifikuar dhe i është kthyer pronarit të saj, duke shmangur kështu humbjen e një shume të madhe parash për qytetarin.

Ky veprim është vlerësuar si një shembull i mirë i ndershmërisë, përgjegjësisë dhe profesionalizmit, duke dëshmuar edhe një herë përkushtimin e pjesëtarëve të Policisë së Kosovës në shërbim të qytetarëve.