Personi që po e akuzon Serbia për vrasjen e policit serb është vëllai i Faton Hajrizit

Artan Hajrizi po akuzohet nga MPB’ja serbe për vrasjen e një polici dhe plagosjen e një tjetri në orët e para të së martës.

Siç raportojnë mediat serbe, në vendngjarje është gjetur pasaporta e një personi me nënshtetësi kosovare, me emrin Artan Hajrizi. Në vendngjarje ishte gjetur edhe një dokument identifikues gjerman.

Siç raporton N1-shi serb, duke e cituar Ivica Daçiq, gjatë kontrollit të automjetit në pikën e kontrollit në Lipniçki Sor në Llozhnicë, fshat në afërsi të pikës kufitare mes Serbisë dhe Bosnjës, punonjësit e policisë kanë ndaluar një “Mercedes” me targa të Tutinës, në të cilin ndodheshin dy persona, përcjell Gazeta Insajderi.

Çdoherë sipas këtij mediumi, Daçiq ka thënë se duke dalë nga vetura, një person ka qëlluar me pistoletë, duke e goditur policin Nikolla Kërsmanoviq (34-vjeçar) në gjoks dhe Vjekoslav Iliq (50-vjeçar) në shpatull, pas së cilës sulmuesi ka ikur.

Gazeta Insajderi nga burime të saj ka mësuar se Artan Hajrizi është vëllai i Faton Hajrizit, i arratisuri nga burgu i Smrekonicës më 6 korrik.

MPB’ja serbe ka publikuar fotografinë e Hajrizit.