Pas 5 viteve e takon xhaxhain prapa grilave në Hagë, mbesa e “Calit” shprehet e emocionuar: Liria do të vijë
Gazetarja Arta Sh Mustafa dje e ka takuar axhën e saj Sali Mustafa, i cili është dënuar nga Gjykata Speciale në Hagë.
Ajo ka treguar se për gati pesë vite nuk e kishe parë axhën e saj, i cili gjatë luftës çlirimtare njihej me nofkën “Cali”.
Në profilin e saj në “Facebook”, ajo ka shkruar për emocionet e kësaj vizite.
“Xhaxhi, sa më kishte marr malli! Dje e takova për herë të parë, pas pothuajse pesë vitesh, axhën tim – Salih Mustafën. U përqafuam pas kaq shumë kohe mungesë, vuajtje, padrejtësi. Nuk ka fjalë që përshkruajnë ndjesinë e atij momenti. Ishte mall, dhimbje dhe krenari – të gjitha në një. Të shohësh dikë që e do, e që për ty është simbol i qëndresës dhe drejtësisë, të mbyllur padrejtësisht kaq gjatë, dhe prapë ta gjesh të fortë, të kthjellët, të qëndrueshëm – është emocion që s’harrohet kurrë”, ka shkruar ajo në profilin e saj në “Facebook”.
Ajo është shprehur optimiste se shumë shpejt do të vije liria edhe për familjarin e saj.
“As koha, as largësia, as izolimi nuk ia kanë zbehur dritën në sy. E mban qëndrimin me dinjitet, ashtu siç e ka mbajtur gjithmonë – me bindjen se e vërteta do të dalë në dritë. Dje u përqafuam, jo vetëm si mbesë e axhë, por si dy gjenerata që nuk e harrojnë asnjëherë sakrificën për liri. LIRIA DO TË VIJË. E do ta presim bashkë, krahë për krahë”, ka shkruar ajo.
