Në dy raste të ndara arrestohen pesë gra e një burrë për prostitucion në Prishtinë
Policia e Kosovës në dy raste të ndara në rajonin e Prishtinës ka arrestuar gjashtë persona, dy gra nga Kosova, tri nga Shqipëria dhe një burrë nga Kosova.
Në rastin e parë, policia tha se ka arrestuar dy gra nga Kosova pasi të njëjtat dyshohet se kanë marrë një objekt banesor me qira, me qëllim të shfrytëzimit të kryerjes së veprës penale “mundësim ose detyrim në prostitucion”.
“Rasti i parë: Policia e Kosovës respektivisht DHTNJ në bashkëpunim me Prokurorinë Themelore Prishtinë pas dyshimeve për kryerje të veprës penale ‘Mundësim ose Detyrim në Prostitucion’ kanë arrestuar dy femra shtetase të Republikës së Kosovës, pasi dyshohet se të njëjtat kishin marrë një objekt banesor me qira, me qëllim të shfrytëzimit për kryerjen e kësaj vepre. Lidhur me rastin dy të dyshuar me vendim të prokurorit kompetent janë dërguar në mbajtje për 48 orë”, thuhet në njoftim të policisë.
Ndërsa, në rastin e dytë, policia tha se pas janë arrestuar tri gra nga Shqipëria dhe një burrë nga Kosova pasi të njëjtit në dy lokale në rajonin e Prishtinës dyshohet se kanë ofruar shërbime seksuale me pagesë.
“Policia e Kosovës respektivisht DHTNJ pas ndërmarrjes së veprimeve hetimore në bashkëpunim me Prokurorinë Themelore Prishtinë pas dyshimeve për kryerjen e veprës penale “Mundësim ose Detyrim në Prostitucion” dhe “Ofrim i lokaleve për Prostitucion”, kanë arrestuar katër persona (3 femra shtetase të Republikës së Shqipërisë, dhe 1 mashkull Kosovar), nën dyshimin se të njëjtit në dy lokale në Rajonin e Prishtinës dyshohet se kanë ofruar shërbime seksuale me pagesë. Të gjithë të dyshuarit me vendim të prokurorit kompetent janë dërguar në mbajtje për 48 orë”, thuhet në njoftim.
