Llapjani e akuzon bashkëshorten për tradhti dhe e rrah, dërgohet në mbajtje për 48 orë

Dyshimet për tradhti dhe xhelozia bëhen shpesh shkaktarë të dhunës që përjetojnë gratë në Kosovë nga partnerët e tyre apo edhe anëtarët e tjerë të familje. Një rast i tillë ka ndodhur së fundmi në një familje në Podujevë, ku viktimë është një grua 28-vjeçare raporton Gazeta Sinjali.

Sinjali mëson se rastin e ka denoncuar gruaja, e cila ka kërkuar ndihmë nga Policia, pasi u përballë me dhunën fizike të ushtruar nga bashkëshorti i saj.

Gjithë ngjarja dyshohet të ketë ndodhur për motive xhelozie për shkak të dyshimeve të burrit se gruaja po e tradhton. I dyshuari ka ushtruar dhunë psikike ndaj gruas, duke i shkaktuar shqetësim të madh.

Përballë kësaj situate, ajo ka vendosur të raportojë rastin në Polici dhe si rezultat i denoncimit, njësitet policore kanë intervenuar në shtëpinë e tyre.

Burri i dyshuar është arrestuar dhe është shoqëruar në stacion policor për intervistim, ndërsa viktima është dërguar në strehimore.

Me urdhër të Prokurorit të Shtetit, i dyshuari është dërguar në mbajtje dhe ndaj tij është iniciuar rasti nën dyshimet për kryerjen e veprës penale ‘Dhunë në familje’.