Leposaviq: 65-vjeçari dorëzon një armë në polici, i sekuestrohet edhe një tjetër armë gjuetie

Një rast i mbajtjes së paautorizuar të armës është zbuluar në fshatin Kutnje të Leposaviqit, ku një 65-vjeçar ka dorëzuar vullnetarisht një armë në polici, por më vonë autoritetet kanë sekuestruar edhe një tjetër armë që posedonte i njëjti person.

Sipas burimeve të Gazetës Sinjali, më 24 janar 2025, një 65-vjeçar është paraqitur në Stacionin Policor të Leposaviqit, ku ka dorëzuar një pushkë gjysmë-automatike të modifikuar në armë përsëritëse për gjueti, kalibër 7.62 mm, prodhim i fabrikës “Crvena Zastava” në Kragujevc të Serbisë.

Megjithatë, i dyshuari nuk posedonte leje valide për armën, por vetëm një aplikacion të vjetër me logon e Administratës së UNMIK-ut, të datës 13 janar 2005.

Pas raportimit të rastit, Prokurori i Shtetit ka urdhëruar hapjen e hetimeve për veprën penale “Mbajtje në pronësi, kontroll apo shfrytëzim të paautorizuar të armës”.

Por, vetëdorëzimi i armës nga 65-vjeçari ka çuar në sekuestrimin e një tjetër arme që ai e posedonte, bashkë me municion.

Dje, Njësia e Hetimeve të Stacionit Policor në Leposaviq, me urdhër të Prokurorit të Shtetit, ka sekuestruar edhe një armë gjuetie, për të cilën i dyshuari kishte aplikuar për leje valide në Republikën e Kosovës.

Gjatë sekuestrimit, është konfiskuar edhe një sasi municioni – tetë fishekë të kalibrit 16.

Hetimet për këtë rast po vazhdojnë, ndërsa i dyshuari është intervistuar në prani të avokatit mbrojtës dhe është liruar në procedurë të rregullt.

Lexo edhe:  Digjet një veturë me targa serbe në Leposaviq