Ky është i arrestuari për kërcënimin me vrasje dhe sulmin fizik ndaj zyrtarëve policorë në Istog

Nuk janë të rralla rastet kur zyrtarët policorë ballafaqohen me kanosje serioze, që eskalojnë në sulme fizike, duke ua vështirësuar punën e kërcënuar jetën.

Një rast i tillë ka ndodhur të martën në Istog, ku një person ka përfunduar në prangat e Policisë, pas kërcënimit dhe sulmit fizik ndaj zyrtarëve policorë.

Sinjali mëson ekskluzivisht se i dyshuari në lidhje me këtë rast është Shqipri Ferataj (rreth 53-vjeçar).

Rasti ka ndodhur kur patrulla policore, gjatë kontrollit të zakonshëm të trafikut, kishte shqiptuar një gjobë ndaj të dyshuarit, i cili më pas ka reaguar në mënyrë të dhunshme.

Burimet e Sinjalit kanë bërë me dije se 53-vjeçari fillimisht i ka ofenduar dhe fyer verbalisht zyrtarët e policisë, duke i kanosur me fjalë të rënda, përfshirë kërcënimin se “do t’i vriste”.

Pas këtyre kërcënimeve, i dyshuari ka tentuar ta godasë njërin nga zyrtarët policorë, ku gjatë përpjekjes për ta ndaluar dhe arrestuar, njëri nga policët ka pësuar lëndime.

Pas arrestimit, i dyshuari është dërguar në stacionin policor, ku është intervistuar në prani të avokatit dhe ka marrë trajtimin mjekësor për lëndimet e pësuara gjatë arrestimit.

Në lidhje me rastin është njoftuar edhe Prokurori, me vendim të të cilit i dyshuari është dërguar në mbajtje për 48-orë.

Rasti po vazhdon të hetohet nga organet kompetente.