Komoran: Nipi e rrah xhaxhain pas konflikteve të shumta, 69-vjeçari dërgohet në QKUK

Konfliktet në mes të familjarëve në vendin tonë janë goxha të shpeshta dhe përcillen me kanosje serioze e përleshje që eskalojnë edhe në rrahje brutale. Problemet për të cilat nuk arrijnë të merren vesh i shtyjnë ata t’i qërojnë vet hesapet, duke u futur kështu në sherr edhe në Polici, raporton Gazeta Sinjali.

Një rast i tillë ka ndodhur gjatë ditës së djeshme në Komoran, ku dy familjarë janë kapur mes vete, pas debateve të shumta.

Siç merr vesh Sinjali, një 28-vjeçar e ka rrahur fizikisht xhaxhain e tij, pasi ky i fundit i kishte dalë në rrugë dhe kishte tentuar që ta godas.

Për pasojë, viktima 69-vjeçar ka pësuar lëndime trupore dhe është dërguar në QKUK, ndërsa i dyshuari u arrestua nga Policia.

I njëjti është shoqëruar në stacion policor, ku u intervistua lidhur me rastin.

Ndaj tij, Prokurori i Shtetit ka urdhëruar masën e ndalimit policor dhe inicimin e hetimit.