Ish-drejtori model i spitalit të Prizrenit tërhiqet nga gara për këtë pozitë

Doktori i njohur, Afrim Avdaj, ka njoftuar se nuk do të garojë më për pozitën e drejtorit të
Spitalit Rajonal të Prizrenit.

Arsyeja e tërheqjes së tij nga gara, sipas Avdajt, ka të bëjë me “pazaret” në konkursin për këtë pozitë.

Avdaj njihet si drejtori që menaxhoi me profesionalizëm të lartë spitalin e Prizrenit, gjatë kohës së pandemisë, shkruan IndeksOnline.

“Shëndetësia humbet kur pazaret fitojnë mbi profesionalizmin”, u shpreh kirurgu i njohut.

Ky është postimi i plotë i tij:

NJOFTIM

Të nderuar kolegë, punonjës të Spitalit Rajonal të Prizrenit dhe qytetarë të Prizrenit,

Përkundër inkurajimit tuaj që të jem konkurrent dhe të rikthej Spitalin e Prizrenit në nivelin ku ishte – një spital që gjatë pandemisë u menaxhua si model në rajon dhe Evropë, bazuar në vlerësimin e ekipit të Institutit Robert Koch të Gjermanisë, si dhe të institucioneve vendore e ndërkombëtare, përfshirë ekipin e ekspertëve nga Lombardia e Italisë – ju falënderoj sinqerisht për inkurajimin dhe mbështetjen tuaj.

Gjatë kësaj periudhe, puna jonë u nderua edhe me titullin “Qytetar Nderi” nga Bashkia e Kukësit, si shenjë mirënjohjeje dhe respekti për kontributin e spitalit tonë.

Gjatë drejtimit tim, Spitali Rajonal i Prizrenit u vlerësua si institucion model në raportin e Auditorit të Përgjithshëm për performancë, duke përmbushur kriteret për akreditim ndërkombëtar dhe duke u konsideruar për t’u shndërruar në Qendrën e dytë Klinike Universitare në Kosovë.

Ky vlerësim u mbështet edhe në indikatorët e cilësisë, shërbimet e reja dhe projektet e inicuara gjatë kohës sonë, si:

•          Shërbimi i Kardiologjisë Invazive,

•          Spitali për Nëna dhe Fëmijë,

•          si dhe shumë projekte të tjera në shërbim të pacientëve dhe qytetarëve tanë.

Megjithatë, me keqardhje ju njoftoj se tërhiqem dhe nuk do të jem pjesë e konkurrimit për Drejtor të Spitalit Rajonal të Prizrenit.

Unë mbetem gjithmonë i gatshëm të jem pranë qytetarëve të Prizrenit dhe stafit tonë, në çdo sfidë që e pret shëndetësinë tonë publike.

“Shëndetësia humbet kur pazaret fitojnë mbi profesionalizmin…”

Me respekt,

Prof. Asoc. Dr. Afrim Avdaj, dr.sci

Kirurg – Endoskopist