Hajnat ua mësyjnë stallave: Vjedhin mbi 10 krerë viça në vlerë të 10 mijë eurove

Një dukuri e shpeshtë që po terrorizon blegtorët në vende të ndryshme në Kosovë dhe që është shndërruar në shqetësim janë vjedhjet e bagëtive. Raste të tilla ka pasur shumë kohëve të fundit, teksa së fundmi cak i hajnave ishte një stallë në fshatin Shpenadi në Prizren, shkruan Gazeta Sinjali.

Burimet nga Prokuroria bëjnë me dije se rasti u zbulua pas denoncimit të pronarit, i cili e njoftoi Policinë se dikush i ka hyrë me forcë në stallë, ku janë vjedhur mbi 10 krerë viça, vlera e të cilëve sillet rreth 10 mijë euro.

Në bazë të dëshmisë së viktimës, të dhënë para hetuesve policorë, vjedhja dyshohet se është kryer mbrëmë gjatë natës, periudhë kjo që është shfrytëzuar nga hajnat meqë familja ka qenë në gjumë.

Me t’u denoncuar rasti, Policia ka nisur hetimet që të identifikohen dhe kapen personat e dyshuar që kanë kryer vjedhjen.

Për rastin është vënë në dijeni edhe Prokurori i Shtetit, i cili ka urdhëruar që rasti të hetohet si “Vjedhje e rëndë”.