Grabitje në lokalin “Mellow” në Prishtinë, hajnat sulmojnë fizikisht një person brenda dhe ia vjedhin telefonin

Siguria publike në Kosovë konsiderohet se po cenohet nga krime të natyrave të ndryshme, e sidomos nga vjedhjet e grabitjet, fenomen ky mjaft shqetësues, që po shkakton humbje e pasiguri në biznese, e jo vetëm.

Hajna herë të vetëm e herë në grup arrijnë të kryejnë vjedhje, madje edhe të rënda, raporton Gazeta Sinjali.

Cak i grabitjes ka qenë ditën e djeshme edhe një lokal në Prishtinë, në lagjen Dardania, ku persona janë futur me forcë duke shkaktuar kaos.

Siç mëson Sinjali, ngjarja ka ndodhur saktësisht te lokali “Mellow”, te Santea, ku disa persona kanë sulmuar fizikisht personin aty brenda, duke i grabitur edhe telefonin.

Sinjali mëson se personat e dyshuar janë të moshës së mitur, teksa njëri prej tyre tashmë është identifikuar.

Policia ka bërë të ditur se është duke e hetuar rastin.