Gjuajtje me armë në Mitrovicë, mbesin 2 persona të plagosur

Dy persona janë plagosur në mesnatë me armë zjarri në veri të Mitrovicës, si pasojë e një përleshjeje dhe janë duke u trajtuar në spital.

Zëvendësdrejtori i policisë për rajonin e veriut, Veton Elshani ka konfirmuar lajmin duke thënë se policia ka marrë informatën rreth orës 2:00 dhe se ka dalë menjëherë në vendngjarje.

“Dy persona janë plagosur në këmbë me armë zjarri dhe janë dërguar për trajtim në spital. Jeta e tyre nuk është në rrezik, ndërsa policia është e interesuar për ta intervistuar një të dyshuar, i cili ndodhet në arrati’, ka thënë Elshani.

Burime të KosovaPressit bënë të ditur se të plagosurit (të nacionalitetit serb) janë N. V. i njohur me nofkën “Xhoni” nga veriu i Mitrovicës dhe N. I. nga Novi Sadi i Serbisë.

Sipas këtyre burimeve, në përleshjen që ka zgjatur rreth gjysmë ore nëpër rrugët “Sutjeska”, “Vllado Cetkovic”, të veriut të Mitrovicës kanë marrë pjesë numër i madh i personave.