Ekipet ndërkombëtare të shpëtimit mbërrijnë në Bosnjë pas përmbytjeve
Ekipet e shpëtimit nga fqinjët e Bosnjës dhe vendet e Bashkimit Evropian të dielën i janë bashkuar përpjekjeve për të pastruar rrënojat dhe për të gjetur njerëz ende të zhdukur nga përmbytjet dhe rrëshqitjet e dheut që shkatërruan pjesë të vendit ballkanik.
Bosnja kërkoi ndihmën e BE-së pasi një stuhi e madhe shiu gjatë natës të së premtes la zona të tëra nën ujë dhe mbeturinat shkatërruan rrugë dhe ura, duke vrarë të paktën 18 njerëz dhe duke lënduar dhjetëra të tjerë.
Zyrtarët thanë se të paktën 10 persona janë ende të pagjetur, shumë prej tyre në fshatin Jabllanicë e Ulët, në Bosnjën jugore, i cili u gropos pothuajse plotësisht në shkëmbinj dhe rrënoja nga një gurore në një kodër sipër, raporton Associated Press.
Banorët atje kanë thënë se kanë dëgjuar një gjëmim bubullimash dhe kanë parë shtëpi të zhduken para syve të tyre.
Luigi Soreca, i cili kryeson misionin e BE-së në Bosnjë, tha në X se BE qëndron me Bosnjën dhe se ekipet po vijnë për të ndihmuar. Bosnja është një vend kandidat për anëtarësim në bllokun 27-vendesh.
Autoritetet thanë se shpëtimtarët kroatë kanë mbërritur tashmë ndërsa një ekip nga Serbia pritet të vendoset pasdite, i ndjekur nga një ekip slloven me qen. Mali i Zi, Maqedonia e Veriut, Polonia, Çekia dhe Turqia gjithashtu kanë ofruar ndihmë, thuhet në një deklaratë të qeverisë.
Të dielën është data e zgjedhjeve lokale në Bosnjë. Autoritetet zgjedhore kanë shtyrë votimin në rajonet e goditura nga përmbytjet, por përmbytjet kanë lënë në hije votimin në të gjithë vendin.
