E tmerrshme: 32-vjeçari rrah gruan deri në alivanosje në sy të fëmijëve të tyre

Dhuna është shndërruar në makth për vajzat dhe gratë në vendin tonë. Ato vazhdimisht kërkojnë ndihmë dhe mbrojtje nga organet e rendit, pasi përballen me dhunë sistematike në forma të ndryshme si psikike, fizike e seksuale, kryesisht nga partnerët e tyre.

Një ngjarje e rëndë dyshohet të ketë ndodhur dje në Pejë, ku një 32-vjeçar po dyshohet se ka ushtruar dhunë ndaj bashkëshortes së tij.

Sinjali mëson se e gjithë ngjarja ka ndodhur në orët e mbrëmjes, kur i dyshuari e kishte sulmuar fizikisht viktimën para syve të fëmijëve, duke e goditur derisa ajo u alivanos.

Gruaja u dërgua menjëherë për trajtim mjekësor, e më pas është kthyer në shtëpi ku ka konsumuar medikamente dhe për pasojë i është përkeqësuar sërish gjendja.

Pas denoncnimit të rastit, i dyshuari është arrestuar dhe është shoqëruar në stacion, ku ka dhënë deklaratë para hetuesve policorë.

Pas përfundimit të procedurave policore, Prokurori i Shtetit ka nxjerrë aktvendim që të dyshuarit t’i caktohet masa e ndalimit policor dhe i njëjti do të hetohet nën dyshimet për kryerjen e veprës penale ‘Dhunë në familje’.