E dhimbshme: Infermieri i QKMF-së në Skenderaj lë punën dhe emigron në Gjermani

Ikja e profesionistëve shëndetësorë nga Kosova, e veçanërisht nga Komuna e Skenderajt, po vazhdon me ritme të larta drejt vendeve perëndimore.

Një rast i tillë ka ndodhur edhe me infermierin e QKMF-së në Skenderaj, Valmir Ahmeti, i cili ka dhënë dorëheqjen dhe është nisur për në Gjermani.

Lajmin për largimin e tij e ka bërë të ditur vetë Ahmeti përmes një postimi në rrjetin social Facebook.

Postimi i plotë i Valmir Ahmetit:

*“Pas gati shtatë vitesh pune në Shërbimin e Urgjencës në QKMF Skenderaj, kam dorëzuar kërkesën për dorëheqje nga pozita e infermierit.

Me këtë rast, dua të shpreh mirënjohjen time të thellë për gjithë stafin e mrekullueshëm të këtij institucioni, për bashkëpunimin dhe përvojën e çmuar që kam fituar gjatë këtyre viteve. Një falënderim i veçantë shkon për gjithë mjekët, infermierët dhe stafin e Urgjencës, veçanërisht për dy miqtë e mi, Nexhat Ahmeti dhe Jeton Gashi, me të cilët kam punuar për shumë vite. Puna përkrah tyre, si profesionistë me mbi dy dekada përvojë në këtë institucion, ka qenë një mundësi e jashtëzakonshme për të mësuar dhe për t’u rritur profesionalisht.

Gjithashtu, dua të falënderoj me respekt të gjithë qytetarët e Komunës së Skenderajt për mirëkuptimin dhe mirënjohjen e tyre për shërbimin shëndetësor.

Gjatë gjithë kësaj periudhe, jam përpjekur të jap më të mirën nga vetja, si në aspektin profesional ashtu edhe në atë njerëzor, duke shpresuar se kam arritur, sado pak, të jem në shërbim të atyre që kishin nevojë për ndihmë.

Me gjithë zemër, ju uroj çdo të mirë secilit prej kolegëve të QKMF Skenderaj dhe çdo qytetari të këtij vendi të bekuar!”*