E dhimbshme: Djalin ia vranë një vit më parë, nëna i jep fund jetës
Një tjetër tragjedi ka goditur familjen Kaso nga Bilishti në Shqipëri. Nëna e Rigels Kasos, 42-vjeçarit që u vra vitin e kaluar, është gjetur pa shenja jete në banesën e saj.
Teuta Kaso, 66 vjeçe, u gjet e pajetë në banesë dhe dyshohet se është vetëhelmuar.
Policia ka referuar materialet në Prokurori për vlerësim, ndërkohë që priten rezultatet e ekspertizës mjekoligjore për të përcaktuar shkakun e saktë të vdekjes.
Si u vra Rigels Kaso
Ngjarja tragjike që i parapriu kësaj humbje ndodhi në korrik të vitit 2024.
Rigels Kaso, 42 vjeç, nga Bilishti, u gjet i shtrirë dhe i dhunuar rëndë në rrugën “Sokrat Miho” në Tiranë, dhe ndërroi jetë pak më vonë në spital.
Sipas hetimeve, Kaso dyshohet se ishte ftuar për një takim nga profili i një gruaje me të cilën kishte komunikuar në rrjete sociale.
Por, në vend të saj, në adresën e dhënë doli bashkëjetuesi i saj, Bajram Gjeleshi, i cili e sulmoi fizikisht duke e goditur me grushte.
Ngjarja ndodhi pak pas mesnatës më 15 korrik, dhe Kaso u gjet nga kalimtarët në orët e para të mëngjesit, të cilët lajmëruan ambulancën.
42-vjeçari kishte qëndruar në Tiranë tre ditë para ngjarjes fatale.