Arrestohet burri nga Klina që e rrahu me grushte bashkëshorten, Prokurori e liron
Dhuna në familje po vazhdon të mbetet një nga damkat më të mëdha të shoqërisë kosovare.
Çdo ditë në Polici raportohen raste ku gratë dhunohen në forma të ndryshme nga burrat, djemtë, vëllezërit e anëtarët e tjerë të familjes. Një rast i tillë ka ndodhur së fundmi në fshatin Carravik të Klinës, ku një burrë dyshohet se e ka sulmuar gruan e tij, por është liruar nga Prokuroria, raporton Gazeta Sinjali.
Burimet e Sinjalit kanë bërë me dije se rasti ka ndodhur sot në mëngjes dhe është denoncuar nga viktima, e cila e ka raportuar burrin, për dhunën që ka ushtruar ndaj saj.
E gjithë ngjarja dyshohet të ketë ndodhur pas një mosmarrëveshje mes tyre, që eskaloi nga dhuna psikike në dhunë fizike. Bazuar në dëshminë e viktimës, i dyshuari e ka goditur disa herë me grushte, duke i shkaktuar lëndime trupore.
Si rezultat i denoncimit, i dyshuari është shoqëruar në stacion policor, ku ka dhënë deklaratën e tij lidhur me rastin.
Ndaj burrit që po dyshohet për dhunë në familje, Prokurori nuk ka urdhëruar masën e ndalimit policor, por vetëm inicimin e rastit dhe lirimin e tij për t’u hetuar në procedurë të rregullt.
Rastet e tilla kur burrat e dyshuar për dhunë ndaj vajzave dhe grave lirohen nuk janë të rralla dhe shpesh ka ngritur debat në opinion se organet e rendit nuk po bëjnë mjaftueshëm për këtë dukuri shqetësuese, që është kthyer në tragjedi për shumë familje.
