Aksidenti me fatalitet në autostradë, personi që vdiq rreth 40-vjeçar – Flasin edhe nga Policia
Një aksident me fatalitet ka ndodhur sonte në autostradën “Arbën Xhaferi”, ku një person ka humbur jetën pasi është goditur nga një veturë. Viktima, i cili është nga Tetova, është përplasur për vdekje nga një veturë në lëvizje teksa ishte i ndalur në shiritin emergjent.
Vdekja e tij tashmë është konfirmuar nga ekipi mjekësor, teksa Policia dhe Prokurori i Shtetit ndodhen në vendin e ngjarjes.
Sinjali ka mësuar tutje se viktima është i moshës rreth 40-vjeçare.
Lajmin e ka konfirmuar për Sinjalin edhe zëdhënësi i Policisë së Kosovës, Bajram Kransiqi.
“Rreth orës 20:40 , policia është njoftuar për një aksident trafiku të ndodhur në autostradën ‘Arbër Xhaferi’.
Njoftimit i janë përgjigjur njësitet policore, të cilat nga vendi i ngjarjes (autostradë, kilometri i parë, drejtimi Prishtinë-Lipijan), raportojnë se në aksident janë përfshirë tri vetura.
Dyshohet që si pasojë e aksidentit, sipas ekipit mjekësor, një person ka humbur jetën.
Në vend-ngjarje kanë dalë njësitet e patrullës se autostradës dhe ata të hetimeve të cilët janë duke kryer shikimin dhe procedurat e parapara për vend-ngjarje.”
Sipas informacioneve të para, vetura e viktimës dhe një veturë tjetër kanë qenë të ndalura në autostradë, ndërsa i ndjeri ka qenë jashtë automjetit kur u godit.
