SBASHK-u tregon veprimin e radhës nëse Qeveria nuk ndryshon mendje për 100 €

Nënkryetari i SBASHK, Ymer Ymeri, ka deklaruar se greva në arsim mund të ndërpritet. Ai potencoi se nëse Qeveria nuk tërhiqet, ata do të konsultohen me anëtarsinë për të parë se si do të veprohet më tej pasi greva është zgjatur shumë.

Ymeri tha se gjasat nuk janë të pamundura që edhe anëtarësia të vendosë për ndërprerje të grevës.

“Nëse Qeveria nuk tërhiqet hiq, ne do të konsultohemi me anëtarësinë se çka do të veprojmë më tutje për shkak se vërtet u zgjat greva shumë dhe sipas të gjitha gjasave po shihet se Qeveria nuk është e gatshme për të asnjë lëvizje. Duhet të konsultohemi me anëtarësinë por kjo mbetet kompetencë e këshillit Grevist të BSPK-së për shkak se edhe shërbyesit civilë janë në grevë dhe koordinimi duhet të jetë patjetër me ta për çfarëdo vendimi që të merret. Krejt çfarë të vendosë anëtarësia ne do të jemi zëri i tyre por gjasat nuk janë të pamundura edhe vetë anëtarësia me pa se nuk ka zgjidhje dhe zgjidhjen duhet bërë vetë” tha Ymeri.

Tutje Ymeri konfirmoi se nuk kanë pasur asnjë ftesë për takim as nga Qeveria dhe as nga Ministria e Arsimit, gjatë kësaj fundjave.

“Nga takimi që kemi bërë me Komisionin e Arsimit nuk ka ndodh takim tjetër me Qeverinë dhe as me Ministrinë e Arsimit. Nuk kemi pranuar ndonjë ftesë për takim tjetër, aq sa unë jam i informuar. Ne si SBASHK nuk kemi pasur takim ndërsa për Këshillin Grevist të BSPK-së nuk e di”, shtoi ai.

Greva në arsim dhe tek shërbyesit civilë ka hyrë sot në javën e pestë.

Palët kanë mbetur të palëkundur në qëndrimet e tyre, pavarësisht disa takimeve të zhvilluar ndërmjet tyre.

Nga SBASHK po kërkojnë një shtesë prej 100 eurosh derisa “Ligji për Paga” të hyjë në fuqi ndërsa nga Qeveria kanë thënë se kanë ofruar mbështetje për mësimdhënësit në Pakon e fundit të miratuar nga Qeveria, raporton Blici.