E rëndë: Sulmohet seksualisht një 13-vjeçare në Malishevë, i dyshuari bie në pranga

Vajzat dhe gratë po vazhdojnë të jenë viktimat më të shpeshta të dhunës në familje, ngacmimeve e sulmeve seksuale. Në shumë raste, viktima janë vajzat e mitura, të cilat keqpërdoren seksualisht nga persona të rritur, raporton Gazeta Sinjali.

Për një rast të tillë që dyshohet se ka ndodhur sot në Malishevë, Prokuroria ka nisur hetimet.

Burimet e Gazetës Sinjali brenda Prokurorisë kanë bërë me dije se një vajzë e mitur e moshës13-vjeçare është ngacmuar seksualisht nga një burrë 57-vjeçar.

Si rezultat i denoncimit, njësitë policore kanë marrë të gjitha veprimet e nevojshme hetimore, me ç’rast kanë arritur që të identifikojnë të dyshuarin, i cili më pas është arrestuar.

57-vjeçari është shoqëruar në stacion policor, ku është intervistuar lidhur me rastin nga organet e hetuesisë.

Pas përfundimit të procedurave policore, Prokurori i Shtetit ka nxjerrë aktvendim që të dyshuarit t’i caktohet masa e ndalimit policor për 48 orë nën dyshimet për kryerjen e veprës penale ‘Sulm seksual’.