Arrestohet drejtori i Agjencisë për Efiçiencë të Energjisë, nënshkroi kontratë rreth 200 mijë euro për projekte që ishin të realizuara

Drejtori i Agjencisë për Efiçiencë të Energjisë është arrestuar të premten nën dyshimin për kontrata rreth realizimit të disa projekteve në Burgun e Dubravës, në vlerë afro 200 mijë euro, ka njoftuar Policia e Kosovës.

Njoftimi i plotë:

Hetuesit policorë nga Njësiti Rajonal për Hetimin e Krimeve Ekonomike dhe Korrupsionit, sot kanë arritur të sigurojnë informata dhe prova për A.K., i cili dyshohet për keqpërdorim të pozitës zyrtare.

I dyshuari, në cilësi të drejtorit të Agjencisë së Kosovës për Efiçiencë të Energjisë, ka nënshkruar kontratë rreth realizimit të disa projekteve në Burgun e Dubravës me një kompani në vlerë prej 199,500.00€.

Dyshohet se projektet në Burgun e Dubravës ishin tashmë të realizuara në vitet 2016-2018, (në Pavionin 4, vlera  271,466.66 €- realizuar në vitin 2016-2018, në Pavionin 6, vlera 233,309.00 € – realizuar në vitin 2016-2018 dhe ndriçimin e perimetrit të jashtëm të Burgut të Dubravës, Faza I, në vlerë 15,240.00 €, Faza II në vlerë 18,675.00 € dhe faza V në vlerë 20,000.00 € – realizuar në vitin 2016-2018). Vlen te ceket se në vitin 2021 ndaj personit të njëjtë ishte iniciuar një rast tjetër nga policia.

Sot, i dyshuari është shoqëruar në polici, është intervistuar ndaj tij është iniciuar rasti ‘keqpërdorim i pozitës apo autoritetit zyrtar’. Në konsultim me prokurorin kompetent, rasti do të zhvillohet në procedurë të rregullt.