Dalja publike e UÇK-së, Xhevahir Geci: S’kemi dashur ta shfaqim Adem Jasharin
Sot më 28 Nëntor të vitit 2022, bëhen 25 vjet që nga dalja publike e Ushtrisë Çlirimtare të Kosovës.
Ishin Mujë Krasniqi, Daut Haradinaj dhe Rexhep Selimi, ata të cilët më 28 nëntor të vitit 1997, në Llaushë të Skenderajt në varrimin e mësuesit Halit Geci kanë dalë për herë të parë para opinionit publik si pjesëtarë të UÇK-së.
Gjenerali i dalë në pension, Xhevahir Geci, ka dhënë detaje rreth asaj se si UÇK-ja vendosi të dalë publikisht.
“Kjo si rezultat i aksioneve të mëhershme të UÇK-së edhe para 27 Nëntorit që kanë qenë aksione të UÇK-së, por edhe luftës frontale që u bë më 27 nëntor të vitit 1997 në Rezallë të Re. Aty janë ballafaquar për herë të parë forcat e UÇK-së me ato serbe ku ka pasur luftime frontale mes dy forcave dhe ka qenë një fitore shumë e suksesshme e organizuar prej akterëve kryesorë të UÇK-së në krye me Adem Jasharin”, tha ai në Klan Kosova.
Tutje, ai ka vazhduar të flasë edhe për rolin e Adem Jasharit në këtë ditë, duke thënë se nuk kanë dashur që ta ekspozojnë atë pasi që ai është marrë vendime me peshë për UÇK-në.
“Adem Jashari ka qenë një figurë karakteristike, kemi dashur ta mbrojmë dhe jo ta shfaqim në opinion e gjerë dhe të komentohet figura e tij. Ddoshta ka qenë edhe vendimi i tij që të mos dalë në publik dhe të merret me gjëra teknike. Komandanti ka marrë vendime më të fuqishme që kanë çuar peshë tek ne”.
