Kontrolloni kuletat, një monedhë 2 euroshe mund të vlejë deri në 3100 euro
Një monedhë e zakonshme prej 2 eurosh që mund ta keni në kuletë, në disa raste mund të vlejë qindra apo edhe mijëra euro.
Koleksionistët janë të gatshëm të paguajnë shuma të mëdha për monedha të rralla ose për ato që kanë gabime gjatë prodhimit.
Një ndër monedhat më të kërkuara është ajo e vitit 2007, e emetuar nga Monako në nder të princeshës Grace Kelly. Nga kjo monedhë janë prodhuar vetëm 20,001 copë dhe vlera e saj në tregun e koleksionistëve mund të arrijë rreth 3,100 euro. Megjithatë, ajo është shpërndarë kryesisht për koleksionistët dhe mundësia për ta gjetur në qarkullim është tepër e vogël.
Vlerë të konsiderueshme mund të kenë edhe monedhat me gabime prodhimi. Për shembull, disa monedha me gabimin e njohur si “veza e skuqur”, ku pjesa e brendshme metalike është vendosur gabimisht, mund të vlejnë deri në 100 euro.
Ndërkohë, një monedhë gjermane prej 2 eurosh e vitit 2021, e prodhuar gabimisht mbi një bazë metalike të monedhës 1-euroshe, është përmendur si shembull i një gabimi që mund të vlerësohet rreth 1,200 euro.
**Por kujdes! Jo çdo monedhë e pazakontë është e vlefshme.** Vlera përcaktohet nga rrallësia, gjendja fizike dhe kërkesa në treg.
Ekspertët këshillojnë që, nëse gjeni një monedhë që ju duket e rrallë, të kontrolloni vitin, shtetin e emetimit dhe detajet e saj. Gjithashtu, mos e pastroni apo lustroni, pasi mund t’ia ulni vlerën.
Prandaj, herën tjetër që merrni kusur në market apo kafene, hidhuni një sy monedhave 2-euroshe. Ndoshta mes tyre fshihet një ekzemplar që vlen shumë më tepër sesa mendoni!
