17-vjeçari nga Prekazi i Poshtëm kapet me armë gjuetie pa leje – iu konfiskua pushka dhe lepuri i vrarë
Një rast i mbajtjes së paautorizuar të armës është regjistruar dje pasdite në Prekaz të Poshtëm, ku një i mitur dyshohet se është kapur me pushkë gjuetie dhe një lepur të vrarë në pronën e një qytetari, mëson ekskluzivisht Gazeta Sinjali.
Ngjarja ka ndodhur rreth orës 15:30, në fshatin Prekaz i Poshtëm.
Sipas të dhënave që disponon Sinjali, ankuesi L.J., rreth 35-vjeçar ka njoftuar Policinë se, teksa ndodhej në oborrin e shtëpisë, kishte dëgjuar britma dhe krisma armësh në tokën e tij. Patrulla policore dhe njësia e hetimeve kanë shkuar menjëherë në vendin e ngjarjes, ku kanë takuar ankuesin, i cili ka treguar se aty ndodheshin dy persona me pushkë gjuetie dhe dy qen zagarë, ndërsa njëri prej tyre mbante një lepur të vrarë.
Gjatë kontrollit, i dyshuari M. F., rreth17-vjeçar është gjetur me një pushkë gjuetie prodhim turk, pa fishekë dhe pa leje përkatëse, armë e cila është konfiskuar nga Policia. Personi tjetër i pranishëm në vendngjarje, i cili posedonte armë me leje, do të intervistohet sot, më 29 nëntor 2025.
Në lidhje me rastin, hetuesit kanë kontaktuar Prokurorin kujdestar, i cili ka udhëzuar që të iniciohet procedura për veprën penale “Mbajtje në pronësi, kontroll ose posedim të paautorizuar të armëve”.
