E konfirmon Policia: Arrestohet personi i dyshuar për plagosjen në Brekoc të Gjakovës

Të shtëna me armë zjarri janë dëgjuar mëngjesin e sotëm në fshatin Brekoc të Gjakovës, ku për pasojë një person ka mbetur i plagosur. I dyshuari tashmë është arrestuar, ndërsa rasti tashmë është konfirmuar edhe nga Policia e Kosovës, raporton Gazeta Sinjali.

Sinjali ka raportuar se i plagosuri dhe i dyshuari në këtë rast janë nga familja Berisha, ndërsa akoma nuk dihet lidhja e saktë familjare mes tyre.

Sipas informacioneve të para, personi që u qëllua me armë zjarri po trajtohet në Spitalin Rajonal në Gjakovë dhe është jashtë rrezikut për jetë.

Rastin për Sinjalin e ka konfirmuar edhe zëdhënësi i Policisë për rajonin e Gjakovës, Sheremet Elezaj.

“Rreth orës 09:30, kemi pranuar informatë për një rast plagosje në fshatin Brekoc-Gjakovë. Njësitet e nevojshme policore dhe ambulanca kanë dalur menjëherë në vendngjarje. Viktima, një person i moshës madhore, është dërguar për trajtim mjekësor. Në lidhje me rastin, është arrestuar një i dyshuar mashkull, gjithashtu i moshës madhore”, ka thënë ai.

Në vendin e ngjarjes janë kryer ekzaminimet e nevojshme nga njësitë përkatëse policore.

Me urdhër të Prokurorit të Shtetit, është iniciuar hetimi për zbardhjen e rrethanave të ngjarjes.