VV-së i ikë kryetari i një dege me dhjetëra aktivistë në Drenas, Lladrovci i thotë “mirë se vjen baxhë”
Kryetari i degës së Lëvizjes Vetëvendosje “Dega 2” në Drenas, Naim Qorri, ka dhënë dorëheqje nga kjo parti.
Qorri tha se po jep dorëheqje nga VV-ja bashkë me dhjetëra delegatë të degës dhe aktivistë të qendrës së VV-së në Drenas, të cilët sipas tij, kanë kontribuar me gjithë potencialin e tyre në këtë parti.
Postimin e tij e shpërndau kryetari i Drenasit, Ramiz Ladrovci, duke shkruar “mirë se vjen baxhë… Bashkë për Drenasin”.
Ndryshe, Qorri tha se “kohët e fundit, kemi përjetuar situata të padurueshme, aspak demokratike dhe denigruese nga udhëheqja e qendrës sonë, veçanërisht nga Qendra në Prishtinë me në krye Enver Dugollin”.
“Kryetarja Egzona Tërdevci, që nga ardhja e saj në krye të degës sonë, ka instaluar një sjellje jo të shëndetshme në lëvizje, dhe së bashku me Enver Dugollin kanë punësuar individë në ndërmarrje publike dhe ministri të ndryshme në mënyrë të pandershme. Këta dy individë morën degën me 6000 vota në zgjedhjet qendrore, dhe për herë të parë morëm pesë asamblistë në zgjedhjet lokale. Megjithatë, për shkak të mos trajtimit të duhur të kërkesave, dy prej tyre tashmë nuk janë më pjesë e Lëvizjes”, shkroi Qorri.
Më tej, ai tha se Tërdevci e Dugolli mbajnë përgjegjësi për humbjen e imazhit të degës së VV-së në Drenas dhe humbjen e mbi 70 për qind të anëtarësisë.
“Zonja Egzona Tërdevci dhe zoti Enver Dugolli mbajnë përgjegjësi për: Humbjen e imazhit të degës dhe mbi 70% të anëtarësisë; Manipulimet me punësime në ndërmarrje publike dhe emërime politike të personave jo meritorë; Mos trajtimin e kërkesave të kryesisë, që ka sjellë humbjen e dy asamblistëve të votuar në Lëvizje, duke lënë vetëm tre nga pesë që kishim, dhe një prej tyre është gjithashtu në dilemë; Ndikimin e tyre në pronat publike të Drenasit, që janë dhënë në shfrytëzim tek të afërmit e ish-asamblistit të VV-së, përfshirë Stacionin e Trenit; Mosfunksionimin e zyrës në Drenas dhe mungesën e aktivitetit koherent”.
