37-vjeçari shkoi për ta kërkuar një person në Hajvali, u qëllua papritmas nga i dyshuari
Një incident ka ndodhur pasditen e sotme në rrugë “Shkëndija” në Hajvali të Prishtinës, ku për motive akoma të panjohura, një person u qëllua dhe mbeti i plagosur. Viktima u dërgua në QKUK, ndërsa i dyshuari është në arrati
Sinjali ka mësuar se personi i plagosur në Hajvali është Lirim Bajrami rreth 37-vjeçar i cili po trajtohet në spital.
Nga informacionet e para që ka siguruar Sinjali dyshohet se plagosja erdhi pasi viktima, Lirim Bajrami shkoi për ta kërkuar një person në Hajvali dhe krejt papritmas u gjuajt me armë zjarri nga personi që tashmë ndodhet në arrati me iniciale L.K.
Rastin për Sinjalin e ka konfirmuar edhe zëdhënësja e Policisë për rajonin e Prishtinës, Flora Ahmeti, ku tha se një person ka mbetur i plagosur nga të shtënat e armës dhe se po trajtohet në QKUK.
“Sot rreth orës 15:00 policia ka marrë informatën për një plagosje me armë zjarri të ndodhur në Hajvali.
Menjëherë pas marrjes së informatës policia ka dalë në vendin e ngjarjes dhe ka ndërmarrë të gjitha veprimet e nevojshme që konsistojnë në hetimin e rrethanave që karakterizojnë ngjarjen. Bazuar në të dhënat fillestare dyshohet se me armë zjarri është plagosur një person, i cili është dërguar për tretman mjekësor”, tha Ahmeti.
Tutje, ajo tha se tashmë Policia e Kosovës janë në kërkim të personit të dyshuar.
“Hetuesit policor në koordinim me prokurorinë, po ndërmarrin veprimet hetimore dhe lidhur me këtë rast i cili është cilësuar si vrasje në tentativë, janë në kërkim të personit të dyshuar L.K, mashkull”, tha ajo.
